ឯកឧត្ដម ជឹង ផល្លា ជួបសំណេះសំណាលជាមួយ ក្រុមប្រឹក្សាស្រុក គណៈអភិបាល មន្ត្រីរាជការ កងកំលាំងប្រដាប់អាវុធ និងក្រុមប្រឹក្សាឃុំ នៃស្រុកដងទង់

ខេត្តកំពត៖ នាព្រឹកថ្ងៃអង្គារ ទី២៨ ខែមករា ឆ្នាំ២០២០ ឯកឧត្ដម ជឹង ផល្លា ប្រធានក្រុមប្រឹក្សាខេត្តកំពត អញ្ជេីញជួបសំណេះសំណាលជាមួយ ក្រុមប្រឹក្សា គណៈអភិបាល មន្ត្រីរាជការ កងកំលាំងប្រដាប់អាវុធ និង ក្រុមប្រឹក្សាឃុំ នៃស្រុកដងទង់​ នៅសាលាស្រុកដងទង់។

ក្នុងពិធីសំណេះសំណាលនោះ មានការអញ្ចើញចូលរួមពី សមាជិកសមាជិកាក្រុមប្រឹក្សាខេត្ត ឯកឧត្តម លោកជំទាវ អភិបាលរងខេត្ត ប្រធានមន្ទីរជុំវិញខេត្ត​ ទីចាត់ការ​ អង្គភាពចំណុះសាលាខេត្ត​ និងមន្ត្រីរាជការសាលាស្រុកដងទង់​។

ឯកឧត្ដម ប្រធានក្រុមប្រឹក្សាខេត្ត បានមានប្រសាសន៍បញ្ជាក់ថា ក្រោមការដឹកនាំរបស់រាជរដ្ឋាភិបាលកម្ពុជាបច្ចុប្បន្ន ដែលមាន សម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្រ្តី គឺការដឹកនាំប្រទេសពីបាតដៃទទេ រហូតមានការរីកចម្រើនលើគ្រប់វិស័យ និងមានសុខសន្តិភាពពេញផ្ទៃប្រទេស​ ការដែលមានអ្វីៗទាំងអស់នេះ គឺបានដោយសារការចូលរួមរបស់ប្រជាពលរដ្ឋ និងមន្រី្តរាជការគ្រប់លំដាប់ថ្នាក់ ព្រមទាំងមានការជឿជាក់លើការដឹកនាំរបស់ប្រមុខរាជរដ្ឋាភិបាល។

ឯកឧត្តមបានថ្លែងអំណរគុណចំពោះមន្ត្រីរាជការក្នុងស្រុកដងទង់​ ដែលកន្លងមកបានខិតខំបំពេញការងារបម្រេីបងប្អូនប្រជាពលរដ្ឋយ៉ាងសស្រាក់សស្រាំ​ ដោយមិនខ្លាចនឿយហត់។ ឯកឧត្តម​ បានបញ្ជាក់បន្ថែមទៀតថា​ ទោះបីយេីងខិតខំបំពេញការងារយ៉ាងណាក៏នៅតែមានចំណុចខ្វះខាត​ ហេីយយេីងត្រូវចូលរួមកាត់បន្ថយនូវចំណុចខ្វះខាតទាំងនោះអោយមកនៅកំរឹតទាបបំផុត​ ជាពិសេសត្រូវខិតខំដោះស្រាយនូវបញ្ហាប្រឈម​ សំណូមពរ​ ជូនបងប្អូនប្រជាពលរដ្ឋនៅមូលដ្ឋានផ្ទាល់៕