ឧត្តមសេនីយ៍ទោ នាង សុជីវី អញ្ជើញចុះត្រួតពិនិត្យលក្ខណៈសម្បត្តិ បេក្ខជន បេក្ខនារី

ភ្នំពេញ៖ ព្រឹកថ្ងៃព្រហស្បតិ៍ ទី០៦ ខែឧសភា ឆ្នាំ២០២១ នៅបញ្ជាការដ្ឋាន កងរាជអាវុធហត្ថលើផ្ទៃប្រទេស លោក ឧត្តមសេនីយ៍ទោ នាង សុជីវី ស្នងការ ស្នងការដ្ឋាន កសាងកម្លាំង បានអញ្ជើញចុះពិនិត្យលក្ខណៈសម្បត្តិ បេក្ខជន បេក្ខនារី បំពេញក្របខ័ណ្ឌ កងរាជអាវុធហត្ថ លើជំនាញពេទ្យ ជំនាញព័ត៌មានវិទ្យា ជំនាញវិស្វកម្ម និងជំនាញបើកបររថយន្ត។ អញ្ជើញចូលរួមក្នុងការត្រួតពិនិត្យ មាននាយការិយាល័យបុគ្គលិក ការិយាល័យហ្វឹកហ្វឺន ការិយាល័យសន្តិសុខផ្ទៃក្នុង ការិយាល័យស្រាវជ្រាវបទល្មើសឧក្រិដ្ឋ ការិយាល័យសុខាភិបាល ការិយាល័យផែនការស្រាវជ្រាវនិងវិភាគ។ ក្នុងពេលនេះ មានការពិនិត្យលើសំណុំឯកសារ ពិនិត្យទឹកមូត្ររកសារធាតុញៀន វាស់កំពស់ ថ្លឹងទម្ងន់ និងសម្ភាសន៍តាមជំនាញនីមួយៗ។