រដ្ឋបាលក្រុងស្វាយរៀង បានបើកកិច្ចប្រជុំបូកសរុបលទ្ធផលការងារប្រចាំខែកុម្ភៈ ឆ្នាំ២០២០ និងទិសដៅអនុវត្តបន្ត

ខេត្តស្វាយរៀង៖ នៅព្រឹកថ្ងៃពុធ ៤រោច ខែមាឃ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី ១២ខែកុម្ភៈ  ឆ្នាំ២០២០ រដ្ឋបាលក្រុងស្វាយរៀង បានបើកកិច្ចប្រជុំបូកសរុបលទ្ធផលការងារប្រចាំខែកុម្ភៈ ឆ្នាំ២០២០ និងទិសដៅអនុវត្តបន្តរបស់រដ្ឋបាលក្រុង ក្រោមអធិបតីភាពលោក ណុប ចំរើន អភិបាល​ នៃគណៈអភិបាលក្រុងស្វាយរៀង។ សមាសភាពចូលរួមមាន លោក លោកស្រីអភិបាលរងក្រុង​​ លោក នាយករដ្ឋបាលក្រុង លោក លោកស្រីនាយក នាយករងរដ្ឋបាលសាលាក្រុង កងកម្លាំងប្រដាប់អាវុធចំណុះសាលាក្រុងទាំង៣ លោកលោកស្រីប្រធាន  អនុប្រធានការិយាល័យ អង្គភាពចំណុះទាំង១៣ លោកស្រីចៅសង្កាត់ ស្មៀនទាំង៧សង្កាត់ក្នុងក្រុង វត្តមានសរុប ៤៣នាក់ ស្រី០៨នាក់ ។

លោកអភិបាលក្រុងបានកោតសរសើរដល់លោក លោកស្រីសមាជិក សមាជិកា​រនៃអង្គប្រជុំពីកិច្ចខិតខំប្រឹងប្រែងអនុវត្តតាមតួនាទីភារកិច្ចសម្រេចបានលទ្ធផលល្អប្រសើរ។ ក្នុងឱកាសនេះដែរលោកអភិបាលបានណែនាំ និងលើកផែនការសម្រាប់អនុវត្តបន្តដូចខាងក្រោម៖
១-បន្តការអនុវត្តការធ្វើវេទិកាសាធារណៈជាមួយប្រជាពលរដ្ឋទៀតអោយបានគ្រប់សង្កាត់
២-ពង្រឹងកម្លាំងប្រជាការពារតាមភូមិ
៣-ពង្រឹងការអនុវត្តច្បាប់ចរាចរណ៍ផ្លូវគោក
៤-បង្ការទប់ស្កាត់បញ្ហាគ្រឿងញៀន
៥-ជំរុញការរៀបចំសណ្ដាប់ធ្នាប់តាមដងផ្លូវ
៦-ការសម្របសម្រួលដោះស្រាយពាក្យបណ្ដឹងក្រៅប្រព័ន្ធតុលាការ
៧-បញ្ហាដីធ្លី និងសំណង់ក្នុងក្រុង
៨-ការផ្តល់​សេវាសាធារណៈជូនប្រជាពលរដ្ឋអោយទាន់ពេលវេលា​ និងតម្លាភាព
៩-ពិនិត្យគ្រោះមហន្តរាយកេីតឡេីងក្នុងមូលដ្ឋាន​ រាយការណ៍​អោយទាន់ពេលវេលា
១០-ការគ្រប់គ្រងកាកសំណល់​រឹង​ សំរាម​ អោយបានល្អប្រសេីរ។