ឯកឧត្តម ថង សាវុន អភិបាលខេត្តរតនគិរី ចុះពិនិត្យស្ថានភាពនៅច្រកទ្វារព្រំដែនអន្តរជាតិអូរយ៉ាដាវ

ខេត្តរតនគិរី៖ នាព្រឹកថ្ងៃទី២៣ ខែមីនា ឆ្នាំ២០២០ ឯកឧត្តម ថង សាវុន អភិបាលខេត្តរតនគិរី បានអញ្ជើញចុះពិនិត្យការងារបង្ការ និងទប់ស្កាត់ដែលអាជ្ញាធរបានអនុវត្តត្រួតពិនិត្យ វាស់ស្ទង់កំដៅប្រជាពលរដ្ឋធ្វើដំណើរចេញ-ចូលខេត្ត និងបាញ់ថ្នាំសម្លាប់មេរោគនៅលើមធ្យោបាយធ្វើដំណើរគ្រប់ប្រភេទ និងបានចុះពិនិត្យស្ថានភាពនៅច្រកទ្វារព្រំដែនអន្តរជាតិអូរយ៉ាដាវ ដែលបច្ចុប្បន្នបានបិទការចរាចរណ៍ឆ្លងកាត់ ដោយអនុញ្ញាតតែមធ្យោបាយដឹកជញ្ជូនទំនិញធំៗប៉ុណ្ណោះដោយមានកិច្ចព្រមព្រៀងដោះដូរអ្នកដឹកជញ្ជូនដោយស្មារតីប្រុងប្រយ័ត្នខ្ពស់បំផុត។

សូមបញ្ជាក់ថា គិតរហូតមកទល់ពេលនេះនៅខេត្តរតនគិរី ពុំមានករណីជំងឺកូវីដ១៩ កើតឡើងចំពោះប្រជាពលរដ្ឋណាម្នាក់ឡើយ។ ទោះយ៉ាងណាឯកឧត្តមអភិបាលខេត្តអំពាវនាវអាជ្ញាធរមានសមត្ថកិច្ច មន្ត្រីជំនាញពាក់ព័ន្ធគ្រប់ផ្នែកបន្តការយកចិត្តទុកដាក់ផ្សព្វផ្សាយអប់រំ និងត្រួតពិនិត្យឲ្យបានម៉ត់ចត់ និងសំណូមពរបងប្អូនប្រជាពលរដ្ឋមេត្តាចូលរួមសហការជាមួយអាជ្ញាធរ ដើម្បីយើងអាចគ្រប់គ្រងបាននូវសភាពការនៃការរាតត្បាតនៃមេរោគកូវីដ១៩នេះ។