ឯកឧត្តម ម៉ែន វិបុល អភិបាលខេត្តស្វាយរៀង ចុះពិនិត្យពីស្ថានភាព នៃការដឹកជញ្ជូនទំនិញ​ និងការពង្រឹងវិធានការបង្ការទប់ស្កាត់ការរីករាលដាលនៃជំងឺកូវីដ-១៩ នៅច្រកទ្វារព្រំដែនទ្វេភាគីបុសមន

ខេត្តស្វាយរៀង៖ នាព្រឹកថ្ងៃសៅរ៍ ៤កេីត ខែពិសាខ ឆ្នាំជូត ទោស័ក ព.ស.២៥៦៣ ត្រូវនឹងថ្ងៃទី២៥​ ខែមេសា ឆ្នាំ២០២០នេះ ឯកឧត្តម ម៉ែន វិបុល អភិបាល នៃគណៈអភិបាលខេត្តស្វាយរៀង និងជាប្រធានគណៈកម្មការប្រយុទ្ធប្រឆាំងនឹងជំងឺកូវីដ-១៩ ខេត្តស្វាយរៀង បានដឹកនាំក្រុមការងារខេត្ត ដោយមានការចូលរួមពីលោកនាយករដ្ឋបាលសាលាខេត្ត​ លោកប្រធានមន្ទីរសាធារណការនិងដឹកជញ្ជូនខេត្ត​ លោកប្រធានសាខាគយ​ និងរដ្ឋាករខេត្ត និងលោកប្រធានទីស្នាក់ការច្រកទ្វារព្រំដែបទ្វេភាគីបុសមន​ បានអញ្ជើញចុះពិនិត្យពីស្ថានភាពនៃការដឹកជញ្ជូនទំនិញឆ្លងកាត់ព្រំដែន​ និងការពង្រឹងអនុវត្តវិធានការបង្ការទប់ស្កាត់ការរីករាលដាល នៃជំងឺកូវីដ-១៩ នៅច្រកទ្វារព្រំដែនទ្វេភាគីបុសមន ស្ថិតនៅឃុំបុសមន ស្រុករំដួល ខេត្តស្វាយរៀង ។

ឯកឧត្ដមអភិបាលខេត្ត បានមានប្រសាសន៍ថ្លែងនូវការកោតសរសើរចំពោះសមត្ថកិច្ច និងមន្ត្រីជំនាញពាក់ព័ន្ធទាំងអស់ ដែលឈរជើងនៅច្រកទ្វារព្រំដែនទ្វេភាគីបុសមនកន្លងមកដែលបានខិតខំអនុវត្តតួនាទីក្នុងការការពារសន្តិសុខ សុវត្ថិភាព សណ្ដាប់ធ្នាប់ព្រំដែន និងការពង្រឹងកិច្ចសហប្រតិបត្តិការល្អប្រសើរជាមួយភាគីវៀតណាម ពិសេសក្នុងការសម្របសម្រួលលេីការដឹកជញ្ជូនទំនិញឆ្លងកាត់ព្រំដែនដោយបញ្ជៀសបាននូវការកកស្ទះ ។

ទន្ទឹមនេះក្នុងនាមជាអភិបាលខេត្ត និងជាប្រធានគណៈកម្មការប្រយុទ្ធប្រឆាំងនឹងជំងឺកូវីដ-១៩ ខេត្ត ឯកឧត្ដមបានស្នើដល់កងកម្លាំង មន្ត្រីគយ និងរដ្ឋាករ មន្ត្រីចត្តាឡីស័ក និងមន្ត្រីមានសមត្ថកិច្ចដែលឈរជើងនៅច្រកទ្វារព្រំដែនទ្វេភាគីបុសមន​ ទាំងអស់ ត្រូវយកចិត្តទុកដាក់អនុវត្តឲ្យបានម៉ឺងម៉ាត់ស្របតាមការណែនាំរបស់រាជរដ្ឋាភិបាល ក្រសួងមហាផ្ទៃ ក៏ដូចជារដ្ឋបាលខេត្តពាក់ព័ន្ធ​នឹងការធ្វើដំណើរចេញចូលឆ្លងកាត់ព្រំដែនរវាងប្រជាពលរដ្ឋប្រទេសទាំងពីរ ដោយឡែកចំពោះការដឹកជញ្ជូនទំនិញឆ្លងកាត់ព្រំដែនរួម ត្រូវសម្របសម្រួលជាមួយភាគីវៀតណាម ដើម្បីសម្រួល និងរក្សាឲ្យបាននូវស្ថិរភាពលំហូរចរាចរទំនិញនាំចេញ-នាំចូលឆ្លងកាត់ព្រំដែនរវាងប្រទេសទាំងពីរឲ្យប្រព្រឹត្តទៅដោយរលូន ល្អប្រសើរ និងក្រោមការយកចិត្តទុកដាក់ខ្ពស់ក្នុងការសហការរួមគ្នាពង្រឹងកិច្ចអនុវត្តវិធានការបង្ការទប់ស្កាត់ការរីករាលដាល នៃជំងឺកូវីដ-១៩ ស្របតាមវិធានការចត្តាឡីស័ក ដូចជាការបាញ់ថ្នាំកម្ចាត់មេរោគលើរថយន្តដឹកទំនិញជាដើម រហូតដល់ស្ថានភាពនៃជំងឺកូវីដ-១៩ មានភាពធូរស្រាលឡេីងវិញ ៕