កិច្ចប្រជុំ​ស្ដីពី​ការធ្វើ​សវនកម្ម​រដ្ឋបាលខេត្ត​ រដ្ឋបាលក្រុង​ ស្រុក​ និងរដ្ឋបាលឃុំ​ សង្កាត់​ការិយបរិច្ឆេទ​២០១៨​ និងឆ្នាំពាក់ព័ន្ធ

 ខេត្តសៀមរាប៖ ថ្ងៃពុធ​ ៩រោច​ ខែកត្ដិក​ ឆ្នាំកុរ​ ឯកស័ក​ ព.ស២៥៦៣​ ត្រូវនឹងថ្ងៃទី២០​ ខែវិច្ឆិកា​ ឆ្នាំ២០១៩ នៅរដ្ឋបាលខេត្ត​សៀមរាប​ លោក​ លី​ សំរិទ្ធ​ អភិបាលរង​ខេត្ត​ តំណាង​ដ៏ខ្ពង់ខ្ពស់​ ឯកឧត្តម​ ទៀ​ សីហា​ អភិបាល​ នៃគណៈអភិបាលខេត្ត និងលោក​ ឧត្តមសេនីយ៍ឯក​ ម៉ែន​ សូរិយន់​ អគ្គនាយករង​ នៃអគ្គនាយកដ្ឋានសវនកម្មផ្ទៃក្នុងក្រសួងមហាផ្ទៃ​ បានអញ្ជើញជាគណ:អធិបតី​ ក្នុងកិច្ចប្រជុំ​ ស្ដីពី​ការធ្វើ​សវនកម្ម​រដ្ឋបាលខេត្ត​ រដ្ឋបាលក្រុង​ ស្រុក​ និងរដ្ឋបាលឃុំ​ សង្កាត់​ សម្រាប់ការិយបរិច្ឆេទ២០១៨​ និងឆ្នាំពាក់ពន្ធ័​ លេីការងារគ្រប់គ្រងបុគ្គលិក​ ការងារ​គ្រប់​គ្រង​ហិរញ្ញវត្ថុ​ និងការងារគ្រប់គ្រងទ្រព្យសម្បត្តិរដ្ឋ​ និងមានការចូលរួមពី​ លោកអភិបាល​ អភិបាលរង​ក្រុង​ ស្រុក​ ប្រធាន​ អនុប្រធាន​ការិយាល័យ​ ប្រតិភូ​អមដំណើរ​ និងអ្នកពាក់ព័ន្ធ​ សរុបចំនួន​ ៤៥នាក់​។

នៅក្នុងកិច្ចប្រជុំនេះដែរ​ លោក​ អភិបាល​រងខេត្ត​  និងលោកឧត្តមសេនីយ៍ឯក​ មានប្រសាសន៍ថាបន្ទាប់ពីបានធ្វើពិធីបើកសវនកម្មផ្ទៃក្នុងជាផ្លូវការនេះទៅ ក្រុមសវនករ​ និងចុះត្រួតពិនិត្យការងារតាមការិយាល័យជំនាញនីមួយៗ នៅរដ្ឋបាលខេត្ត​ រដ្ឋបាលក្រុង​ ស្រុក​ និងរដ្ឋបាលឃុំ សង្កាត់ គោលដៅមួយចំនួន​ ក្នុងគោលបំណងដើម្បីពង្រឹងប្រសិទ្ធិភាពការងារដូចជា ការគ្រប់គ្រងបុគ្គលិកមន្ត្រីរាជការ​ ការគ្រប់គ្រងធនធានមនុស្ស​ ការគ្រប់គ្រងហិរញ្ញវត្ថុ និងអចលនទ្រព្យរបស់រដ្ឋជាដើមដើម្បីរកឲ្យឃើញនៅចំណុចល្អៗ​ និងបញ្ហាប្រឈមមួយចំនួនដែលជួបប្រទះ​ និងផ្សព្វផ្សាយដល់អង្គភាពដែលពាក់ពន្ធ័ដេីម្បីធ្វើការកែលម្អ និងទុកជាត្រីវិស័យសម្រាប់អនុវត្តឆ្នាំបន្ត។

លោកអភិបាលរងខេត្ត​ និងលោកឧត្ដមសេនីយ៍ឯក​ អគ្គនាយករង​ ​នៃអគ្គនាយកដ្ឋានសវនកម្មផ្ទៃក្នុងក្រសួងមហាផ្ទៃ​ បានសំណូមពរដល់គ្រប់អង្គភាពពាក់ពន្ធ័ទាំងអស់ និងក្រុមការងារត្រូវសហការអនុវត្តឲ្យបានល្អដោយអនុលោមទៅតាមគោលការណ៍គតិយុត្តមានជាធរមាន៕