កម្លាំងចម្រុះចុះពិនិត្យ និងចាត់វិធានការផ្លូវច្បាប់ចំពោះការដ្ឋានជីកដីអាណាធិបតេយ្យ នៅឃុំបាគង ស្រុកប្រាសាទបាគង

ខេត្តសៀមរាប៖ នៅថ្ងៃទី១៥ ខែមករា ឆ្នាំ២០២០ ក្រុមការងារមន្ទីររ៉ែនិងថាមពលខេត្ត រដ្ឋបាលស្រុកប្រាសាទបាគង ស្នងការដ្ឋាននគរបាលខេត្ត(ការិយាល័យប្រឆាំងបទល្មើសសេដ្ឋកិច្ច) អធិការដ្ឋាននគរបាលស្រុកប្រាសាទបាគង និងបញ្ជាការដ្ឋានកងរាជអាវុធហត្ថស្រុកប្រាសាទបាគង បានសហការចុះពិនិត្យ និងចាត់វិធានការផ្លូវច្បាប់ចំពោះការដ្ឋានជីកដីអាណាធិបតេយ្យ នៅឃុំបាគង ស្រុកប្រាសាទបាគង ណែនាំឲ្យផ្អាកសកម្មភាព និងធ្វើការផាកពិន័យតាមមាត្រ៣៥ថ្មី ច្បាប់ស្តីពីវិសោធនកម្ម នៃច្បាប់ស្តីពីការគ្រប់គ្រង និងការធ្វើអាជីវកម្មធនធានរ៉ែ។

ការណែនាំឲ្យផ្អាកសកម្មភាពនេះមានចំនួនពីរការដ្ឋាន៖
១.ការដ្ឋានជីកបកដីស្រែ ទំហំ ៣០ម៉ែត្រX៦០ម៉ែត្រ Xជម្រៅ០,៤ម៉ែត្រ មានអេស្ការចំនួន ៣គ្រឿង ថាយល័រ ១គ្រឿង ប៊ុលដេស័រ ១គ្រឿង ឡានស្រោចទឹក ១គ្រឿង ឡានដឹកដី ១គ្រឿង

២.ការដ្ឋានជីកបកដីស្រែ ទំហំ ៣០ម៉ែត្រX៥០ម៉ែត្រ Xជម្រៅ០,៤ម៉ែត្រ មានអេស្ការចំនួន ១គ្រឿង ប៊ុលដេស័រ ១គ្រឿង៕