កិច្ចប្រជុំពិនិត្យពិភាក្សា និងវាយតម្លៃលក្ខណៈសម្បត្តិមន្រ្តីរាជការ ដែលបម្រើការងារនៅសាលាខេត្ត ក្រុង ស្រុក នៃខេត្តសៀមរាប ដើម្បីស្នើសុំគ្រឿងឥស្សរិយយសសម្រាប់ឆ្នាំ២០១៩

ខេត្តសៀមរាប៖ ថ្ងៃ​អង្គារ១២រោច​ ខែ​បុស្ស​ ឯកស័ក​ ព.ស២៥៦៣​ ត្រូវនឹងថ្ងៃទី២២ខែមករា​ ឆ្នាំ​២០២០​ នៅបន្ទប់ប្រជុំលេខ​ ០១​ របស់សាលាខេត្តសៀមរាប បានរៀបចំកិច្ចប្រជុំពិនិត្យ ពិភាក្សា និងវាយតម្លៃលក្ខណៈសម្បត្តិមន្រ្តីរាជការដែលបម្រើការងារនៅសាលាខេត្ត ក្រុង ស្រុក នៃខេត្តសៀមរាប ដើម្បីស្នើសុំគ្រឿងឥស្សរិយយស  សម្រាប់ឆ្នាំ២០១៩​ ក្រោមអធិបតីភាព​លោក​ នាក់​ ណេរ៉ុន​ អភិបាលរងខេត្ត​ តំណាង​ដ៏ខ្ពង់ខ្ពស់​ ឯកឧត្ដម​ ទៀ​ សីហា​ អភិបាល​ នៃគណៈអភិបាលខេត្ត ព្រមទាំងមានការចូលរួមពី នាយករងរដ្ឋបាលសាលាខេត្ត អភិបាល អភិបាលរងក្រុង ស្រុក ប្រធាន អនុប្រធានមន្ទីរ អង្គភាពជុំវិញខេត្ត នាយក នាយករងទីចាត់ការគ្រប់គ្រងធនធានមនុស្ស នាយករដ្ឋបាលក្រុង ស្រុក សរុបចំនួន៣២នាក់។

កិច្ច​ប្រជុំ​នេះ​ គឺពិភាក្សា​ និងជ្រើសរើសយកមន្រ្តីដែលបំពេញការងារមានស្នាដៃល្អ និងសកម្មក្នុងការអនុវត្តការងារ ដើម្បីស្នើសុំគ្រឿងឥស្សរិយយសជូនមន្រ្តីរាជការ ឲ្យស្របតាមសេចក្តីណែនាំលេខ ០០៨សណន ចុះថ្ងៃទី២៧ ខែសីហា ឆ្នាំ​២០០២ ​របស់​ក្រសួង​មហា​ផ្ទៃ ស្តីពីការរៀបចំបែបបទស្នើសុំប័ណ្ណសរសើរ និងគ្រឿងឥស្សរិយយស នៃព្រះរាជាណាក្រកម្ពុជា បាន​កំណត់ចំនួនសមាមាត្រ ១០% ត្រូវបានបែងចែកជ្រើសរើសក្នុង ក្របខ័ណ្ឌមន្រ្តីរដ្ឋ​បាល​ជាន់ខ្ពស់ចំនួ​ន០២%, ក្របខ័ណ្ឌក្រមការចំនួន០៣% និងក្របខ័ណ្ឌលេខាធិការរដ្ឋបាលចំនួន០៥%។

លោក នាក់ ណេរ៉ុន អភិបាលរងខេត្តសៀមរាប ក៏បានសង្កត់ធ្ងន់ថា សូមថ្នាក់ដឹកនាំទាំងអស់ត្រូវជ្រើសរើសមន្ត្រីអោយមានតម្លាភាព និងយុត្តិធម៌ ព្រោះថាប្រសិនយើងជ្រើសរើសមន្រ្តីរាជការមិនបានត្រឹមត្រូវ ទេនោះ ធ្វើឱ្យមន្ត្រីផ្សេងទៀតមានការថ្នាំងថ្នាក់ និងមានសតិអារម្មណ៍ផងដែរ។

ប្រភព៖ រដ្ឋបាលខេត្តសៀមរាប