កំលាំងនគរបាលប្រឆាំងបទល្មើសសេដ្ឋកិច្ច​ និងអធិការដ្ឋានក្រុង ស្រុកចុះតាមដាននិងផ្សព្វផ្សាយមិនឲ្យលក់ចែកចាយឧបករណ៍ធ្វើតេស្តមេរោគកូវីដ ១៩

ខេត្តសៀមរាប៖ ថ្ងៃទី៣០​ ដល់ថ្ងៃទី៣១ ខែមីនា ឆ្នាំ២០២០​​នេះ អនុវត្តតាមអនុសាសន៍របស់ប្រមុខរាជរដ្ឋាភិបាល និងបទបញ្ជារបស់ ឯកឧត្តម ទៀ សីហា អភិបាលនៃគណៈអភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្ត ស្នងការដ្ឋាននគរបាលខេត្តសៀមរាប បានចាត់កំលាំងនគរបាលប្រឆាំងបទល្មើសសេដ្ឋកិច្ច​ និងកំលាំងអធិការដ្ឋាននគរបាលក្រុងស្រុកទាំង​ ១២ ចុះត្រួតពិនិត្យផ្សព្វផ្សាយ និងស្រាវជ្រាវ តាមបណ្តាទីតាំងលក់ឱសថ និងសេវាសុខាភិបាលឯកជន ដើម្បីពិនិត្យមើលការលក់ចែកចាយឧបករណ៍ធ្វើតេស្តមេរោគកូវីដ ១៩ នៅក្នុងភូមិសាស្ត្រ ខេត្តសៀមរាប សរុបចំនួន៣៨៨កន្លែង មានដូចខាងក្រោម៖
ក/ ការិ.នគរបាលប្រឆាំងបទល្មើសសេដ្ឋកិច្ចចំនួន ១២១កន្លែងគឺៈ
   - ឱសថស្ថានចំនួន ៨៥កន្លែង
   - ឱសថស្ថានរងចំនួន ០៤កន្លែង
   - បន្ទប់ពិគ្រោះព្យាបាលជំងឺចំនួន ២៤កន្លែង
   - បន្ទប់ថែទាំជំងឺចំនួន ០១កន្លែង
   - បន្ទប់ពិសោធន៍វេជ្ជសាស្ត្រចំនួន ០៧កន្លែង
ខ/ អធិការដ្ឋាននគរបាលក្រុង ស្រុកចំនួន ២៥៨កន្លែងក្នុងនោះ
   - ឱសថស្ថានចំនួន ២០១កន្លែង
   - ឱសថស្ថានចំនួន ០២កន្លែង
   - បន្ទប់ពិគ្រោះព្យាបាលជំងឺចំនួន ៣៨កន្លែង
   - បន្ទប់ថែទាំជំងឺពិនិត្យផ្ទៃពោះចំនួន ០៩កន្លែង
   - កន្លែងលក់ឥវ៉ាន់ចាប់ហួយចំនួន ០៨កន្លែង
ជាលទ្ធផល​ ពុំមានការដាក់លក់ឧបករណ៍ធ្វើតេស្តមេរោគកូវីដ ១៩នោះទេ។

ទន្ទឹមនឹងនេះស្នងការដ្ឋាននគរបាលខេត្ត​ នឹងបន្តចុះផ្សព្វផ្សាយ​ និងស្រាវជ្រាវរកឧបករណ៍ធ្វើតេស្តមេរោគកូវីដ ១៩​បន្តទៀត។ ក្នុងករណីមានជនណា​ ឬហាងណាលក់ឧបករណ៍ធ្វើតេស្តមេរោគកូវីដ ១៩​នេះ​ សមត្ថកិច្ចនឹងចាត់វិធានការតាមផ្លូវច្បាប់យ៉ាងតឹងរ៉ឹង។ សូមបញ្ជាក់ថា ក្រសួង សុខាភិបាល បានជូនដំណឹងថា មកទល់ពេលនេះរាល់ក៏ធ្វើតេស្តរកវីរុសកូវីដ គឺមានតែមន្ទីរពិសោធន៍ប៉ាស្ទ័រ ហើយឧបករណ៍ដែលមានផ្សព្វផ្សាយលក់កន្លងមក ពុំទាន់មានការទទួលស្គាល់ពីអង្គការសុខភាពពិភពលោកនៅឡើយ។

រដ្ឋបាលខេត្តសូមអំពាវនាវដល់ប្រជាពលរដ្ឋទាំងអស់ សូម​រាយការណ៍​ជាបន្ទាន់​ដល់សមត្ថកិច្ច ក្នុងករណី​សង្ស័យ​ ឬដឹងថាមានកន្លែងណាលក់ឧបករណ៍ធ្វើតេស្តមេរោគកូវីដ ១៩​នៅក្នុងភូមិសាស្រ្តខេត្តសៀមរាប ឬរាយការណ៍តាមទូរស័ព្ទ​លេខ 017283333​ ឬ​098588885 ឬ 012495262។