លោក ឡុង ឌីម៉ង់ អញ្ជើញចូលរួមមហាសន្និបាតលើកទី៤៥ របស់សមាគមអន្តរជាតិ នៃអភិបាលក្រុងហ្វ្រង់កូហ្វូន(AIMF)

នាថ្ងៃទី២៩ ខែមេសា ឆ្នាំ២០២៥ លោក ឡុង ឌីម៉ង់ អភិបាលរងខេត្តព្រះសីហនុ បានតំណាងឯកឧត្តមអភិបាល នៃគណៈអភិបាលខេត្ត អញ្ជើញចូលរួមមហាសន្និបាតប្រចាំឆ្នាំលើកទី៤៥ របស់សមាគមអន្តរជាតិ នៃអភិបាលក្រុងហ្វ្រង់កូហ្វូន(Association Internationale des Maires Francophones, AIMF) នៅទីក្រុងវ៉េ ប្រទេសវៀតណាម។

លោកអភិបាលរង បានគូសបញ្ជាក់ថា ភាពជាសមាជិកAIMFបានផ្តល់អត្ថប្រយោជន៍យ៉ាងច្រើនដល់ខេត្ត-ក្រុងដូចជា៖ ការទទួលបានការបណ្តុះបណ្តាលពាក់ព័ន្ធនឹងការរៀបចំទីក្រុង, ការគ្រប់គ្រងបរិស្ថាន, ការឆ្លើយតបនឹងបម្រែបម្រួលអាកាសធាតុ, និងការត្រៀមបង្ការនិងឆ្លើយតបនឹងគ្រោះមហន្តរាយ, ព្រមទាំងការទទួលបានជំនួយធនធាន និងបច្ចេកទេសនានាជាដើម។

នៅក្នុងមហាសន្និបាតប្រចាំឆ្នាំនេះ ខេត្តកំពង់ធំ ទទួលបានការឯកភាពជាឯកច្ឆន្ទក្នុងការចូលរួមជាសមាជិកពេញសិទ្ធផងដែរ។

គួររម្លឹកថា កន្លងមក ប្រទេសកម្ពុជាមានរាជធានី-ខេត្តចំនួន០៥ បានចូលជាសមាជិកនៃAIMFរួចមកហើយគឺ៖ រាជធានីភ្នំពេញ, ខេត្តសៀមរាប, ខេត្តបាត់ដំបង, ខេត្តកំពត, និងខេត្តព្រះសីហនុ ដែលខេត្តទាំងនេះបានបង្កើតនិងរក្សាទំនាក់ទំនងយ៉ាងល្អ ជាមួយសមាជិកបណ្តាញខេត្ត-ក្រុងក្នុងតំបន់ និងសកលលោក ព្រមទាំងទទួលបានចំណេះដឹង បទពិសោធន៍ និងអនុវត្តគម្រោងកិច្ចសហប្រតិបត្តិការនានា ដែលជាផ្នែកមួយធានាដល់ការអភិវឌ្ឍទីក្រុងប្រកបដោយចីរភាព។