ព្រឹកថ្ងៃទី២៨ ខែវិច្ឆិកា ឆ្នាំ២០១៩ នេះ នៅសាលប្រជុំមន្ទីរផែនការខេត្ត បានបើកកិច្ចប្រជុំ ស្តីពីការពិគ្រោះយោបល់ របស់គណៈកម្មាធិការសម្របសម្រួលបច្ចេកទេស លើសេចក្តីព្រាងកម្មវិធីបំនិយោគបីឆ្នាំរំកិលខេត្ត(២០២០ ២០២២) ក្រោមអធិបតីភាព ឯកឧត្តម អ៊ុន ចាន់ដា អភិបាល ខេត្តកំពង់ចាម ។ កិច្ចប្រជុំនេះ ក៏មានការអញ្ជើញចូលរួម ពីឯកឧត្ដម លោកជំទាវ ជាសមាជិក្រុមប្រឹក្សាខេត្ត លោក លោកស្រី ជាថ្នាក់ដឹកនាំ មន្ត្រីរាជការ មន្ទីរ អង្គភាព ស្ថាប័ន ជុំវិញខេត្ត និងអភិបាល ក្រុង ស្រុក ព្រមទាំង តំណាងអង្គការសង្គមស៊ីវិល និងមន្ត្រីជំនាញពាក់ព័ន្ធ សរុបប្រមាណជា ១១៨នាក់ ផងដែរ។ ថ្លែងនាឱកាសនោះ ឯកឧត្តម អ៊ុន ចាន់ដា បានចាត់ទុកថា ថ្ងៃនេះ ក្រុមការងារកសាងផែនការរបស់រដ្ឋបាលខេត្ត បានអញ្ជើញឯកឧត្តម លោកជំទាវ លោក លោកស្រី ជាសមាជិកគណៈកម្មាធិការសម្របសម្រួលបច្ចេកទេសខេត្ត ដើម្បី ប្រជុំពិគ្រោះយោបល់លើសេចក្តីព្រាង កម្មវិធីវិនិយោគបីឆ្នាំរំកិល(២០២០-២០២២) និងត្រួតពិនិត្យមើលលើការពិពណ៌នា អំពីស្ថានភាពបច្ចុប្បន្ន របស់រដ្ឋបាលខេត្ត និងវាយតម្លៃ តាមបណ្តាមន្ទីរ អង្គភាពជុំវិញខេត្ត សម្រាប់អនុវត្តកម្មវិធីវិនិយោគបីឆ្នាំរំកិល(២០២០-២០២២) ឲ្យស្របតាមផែនការអភិវឌ្ឍន៍រយៈពេល ៥ឆ្នាំ (២០២០-២០២៥) ឲ្យសម្រេចបានជោគជ័យ ក្នុងអាណត្តិទី ៣ របស់ក្រុមប្រឹក្សាខេត្ត ។
នាឱកាសនោះដែរ ឯកឧត្តមអភិបាលខេត្ត សំដែងនូវការស្វាគមន៍ និងថ្លែងអំណរគុណ ផងដែរចំពោះ ការយកចិត្តទុកដាក់របស់មន្ទីរ អង្គភាពជុំវិញខេត្ត និងអង្គការនានា ដែលបានចូលរួមយ៉ាងសកម្មក្នុងដំណើរការសិក្ខាសាលាសមាហរណកម្ម កម្មវិធីវិនិយោគឃុំ/សង្កាត់ ក្រុង/ស្រុក ហើយគាំទ្រគម្រោង ទៅតាមលទ្ធភាព និងសកម្មភាពរបស់ខ្លួន សម្រាប់អនុវត្តក្នុងឆ្នាំ២០២០ ខាងមុខ ។
ជាក់ស្តែង លទ្ធផលសិក្ខាសាលាសមាហរណកម្ម កម្មវិធីវិនិយោគ ឃុំ/សង្កាត់ ក្រុង/ស្រុក ទទួលបានសរុបចំនួន ២.៦៥៧គម្រោង ស្មើនឹង៥៥% នៃគម្រោងស្នើឡើងចំនួន ៤.៨២៥គម្រោង មន្ទីរ អង្គភាពគាំទ្របានចំនួន ២. ៣២៧គម្រោង អង្គការសង្គមស៊ីវិលគាំទ្រ បានចំនួន ៣២៩គម្រោង និងសប្បុរសជនចំនួន ០១គម្រោង ។ ដោយឡែក គម្រោងវិនិយោគកំពុងដំណើរការ មានចំនួន ២៤គម្រោង ដែលត្រូវចំណាយថវិកាសរុបអស់ ៥០.៣១២លានរៀល និងគម្រោងដែលមានថវិកាគាំទ្រ មានចំនួន ៣៧០គម្រោង ដែលត្រូវចំណាយថវិកាអស់ ៣៨៩.២៣០លានរៀល ដែលត្រូវអនុវត្តក្នុងឆ្នាំ២០២០ ។ ទន្ទឹមនឹងនោះ គម្រោងទាំងនេះ ពិតជាស្ដែងឡើងនូវការរីកចម្រើនលើកគ្រប់វិស័យ ធ្វើឲ្យប្រជាពលរដ្ឋ មានកំណើនសេដ្ឋកិច្ចគ្រួសារ កាត់បន្ថយភាពក្រីក្រ និងការចំណាកស្រុក ហើយជម្រុញកំណើនសេដ្ឋកិច្ចក្នុងខេត្ត និងការអភិវឌ្ឍប្រទេសជាតិ ឲ្យប្រជាជន រួចផុតពីបន្ទាត់ក្រីក្រ ជាបន្តបន្ទាប់ ។
ឯកឧត្ដម អ៊ុន ចាន់ដា ក៏បានផ្ដល់នូវចំណាប់អារម្មណ៍មួយចំនួនដែលពាក់ព័ន្ធទៅនឹងការងារ និងទិសដៅដំណើរការ កសាងកម្មវិធីវិនិយោគបីឆ្នាំរំកិល(២០២០-២០២២) សម្រាប់អនុវត្តនៅឆ្នាំ២០២០ ដោយសូមលោក លោកស្រី ប្រធានមន្ទីរ អង្គភាពជម្រុញការអនុវត្តគម្រោងនីមួយៗ ឲ្យចប់តាមការកំណត់ ដោយធ្វើការសហការជាមួយអាជ្ញាធរមូលដ្ឋានឲ្យបានជិតស្និទ្ធ។ ត្រូវប្រើប្រាស់ឲ្យអស់លទ្ធភាពធនធាន ដែលបានពីថ្នាក់ជាតិតាមរយៈ ក្រសួង ឬធនធានពីដៃគូនានា ដើម្បីបន្តការអភិវឌ្ឍន៍ជារៀងរាល់ឆ្នាំ ធ្វើយ៉ាងណាឲ្យជីវភាពរស់នៅ របស់ប្រជាពលរដ្ឋ ។ ត្រូវរៀបការងារកសាងកម្មវិធីវិនិយោគបីឆ្នាំរំកិល(២០២០-២០២២)នេះ ឲ្យឆ្លើយតបទៅនឹងគោលនយោបាយ យុទ្ធសាស្ត្រចតុកោណដំណាក់កាលទី៤ អាណត្តិទី៦ របស់រដ្ឋសភា និងគោលនយោបាយយុទ្ធសាស្រ្តអភិវឌ្ឍន៍ជាតិ យ៉ាងពិតប្រាកដ ។ ក្រៅពីនោះ ក្រុមការងារកសាងផែនការខេត្ត ត្រូវយកឯកសារទាំងនេះទៅកែតម្រូវពាក្យពេជន៍បន្ថែម ដើម្បី ដាក់ជូនក្រុមប្រឹក្សាខេត្តអនុម័ត ទៅតាមប្រតិទិនការងារដែលបានកំណត់ ៕
0 Comments
Post a Comment